كان فرح واحدة قريبتى الكل معزوم و العروسة جت و الدنيا حلوة فجأة لقيت واحدة من المعازيم بتبصلى و عنيها مليانة حسرة و الله يا بنتى بدعيلك فى كل صلاة ربنا يرزقك بابن الحلال دانا بدعيلك قبل بنتى حتى أصل هى لسه صغيرة
بصيتلها و قولتلها : كل شئ نصيب و بعدين أنا بشتغل و عايشة حياتى مش ناقصنى حاجة
ردت : لأ و هى الواحدة ممكن تستغنى برضه عن الجواز هى دى تبقى عيشة
قبل ما أرد ماما ندهتلى و قالت : أيه اللى معدك مكانك مش تتحركى أنتى عايزة الناس تقول إنك غيرانة
من أيه حاغير من أيه ؟؟؟؟؟؟؟؟ طبعا سابتنى و مشيت
فضل الفرح ماشى مابين أنى واقفة أصقف و ما بين كلمات من نوعية ربنا يرزقك بابن الحلال لكن لما رجعت البيت بعد الفرح فكرت فى كلامهم هما ليه شايفين أن الحياة إتجاه واحد و إنى إذا متجوزتش تبقى الدنيا اتهدت أنا بشتغل و بعرف الدنيا من حواليا بالأضافة إلى أن أغلب الجوازات اللى أنا شايفاها مش ناجحة مش بكلامى بكلام أصحابها بعد كام شهر كل واحدة تقول ( دا مشروع فاشل ) يمكن لأنهم أتسرعوا و يمكن لأنهم أختاروا غلط أو لأن سن 30 بقى بعبع البنات مش عارفة على العموم أنا مبسوطة كده .
